Makamu mkuu wa Chuo Kikuu cha Sokoine cha Kilimo, Prof. Raphael Chibunda, amewataka wanafunzi wa Kampasi ya Mizengo Pinda kutumia vyema Elimu wanayoipata ili waweze kukabiliana na changamoto ya ajira kwa kujiunga na kujisajili katika vikundi ili waweze kupata pesa na kuendesha miradi ya ujasiriamali kama ufugaji wa nyuki, kutoa elimu kwa jamii juu ya ufugaji bora na wenye tija ili kujiongezea kipato na kuachana na dhana ya kusubiria ajira kutoka Serikalini.
Prof. Chibunda ameyasema hayo tarehe 7 /11/2022, alipotembelea Kampasi ya Mizengo Pinda na kukagua miradi mbalimbali ya maendeleo na kujionea maeneo ya mradi wa upanuzi wa kampasi hiyo.
Pia Prof Chibunda ameishukuru serikali ya Jamhuri ya Muungano wa Tanzania, chini ya Rais Mh. Samia Suluhu Hassan, kwa kutenga kiasi cha shilingi Bilioni ishirini kwa ajili ya miradi ya maendeleo katika Kampasi hiyo.
Wakati huo huo Prof. Chibunda alipata nafasi ya kutembelea eneo linalochimbwa kisima cha maji katika Kampasi hiyo na kuendelea kumshukuru Rais wa Jamhuri ya muungano wa Tanzania M.h Samia Suluhu Hassan kwa kuendelea kutoa pesa za maendeleo katika chuo chetu.
Pia, makamu mkuu wa Chuo Kikuu cha Sokoine cha Kilimo Prof Chibunda akipokea taarifa kutoka kwa katibu wa kamati ya ufuatiliaji wa ardhi kwa ajili ya upanuzi wa Kampasi ya Mizengo Pinda.
